ഒരു KSRTC അനുഭവം!

ഒരു KSRTC അനുഭവം! തിയതി 09.04.2019. ബസ്സ്‌ RPC101 KL15A763. ജോലി സംബന്ധമായ ഒരു ആവശ്യത്തിന് തിരുവനന്തപുരം സന്ദർശിച്ചു തിരിച്ചു പോരുകയാണ്. തലസ്ഥാനത്തു നിന്ന് കൊല്ലം, ആലപ്പുഴ, തോപ്പുംപടി വഴി എറണാകുളം സ്റ്റാന്റ്, ഇടപ്പിള്ളി, പറവൂർ കൊടുങ്ങല്ലൂർ, ഗുരുവായൂർ, കോഴിക്കോട് പോകുന്ന വണ്ടി. പുറപ്പെടൽ സമയം 16:15. പകൽ സമയത്തെ തിരക്ക് പിടിച്ച കാര്യങ്ങൾ പൂർത്തീകരിച്ചു ഉച്ചഭക്ഷണം വൈകി കഴിച്ച് അവസാനം 16:00 ന് എന്റെ സുഹൃത്ത് മധുവേട്ടൻ തമ്പാനൂരിൽ കൊണ്ട് വിട്ടു. 16:15ന് സമയം കാണിച്ച വണ്ടി പിടിക്കണം എന്ന ലക്ഷ്യം.

കൗണ്ടറിൽ ചോദിച്ചപ്പോൾ നേരെ മുൻപിലുള്ള റാമ്പിൽ വരുമെന്ന് പറഞ്ഞു. പറഞ്ഞ സമയം കഴിഞ്ഞ് ചോദിച്ചപ്പോളും ഇപ്പൊ വരും. കാൻസൽ അല്ല എന്ന് ആ സർ ക്ഷമയോടെ അറിയിച്ചു. ഇതിനിടയിൽ ആരോടൊക്കെയോ ഫോണിലും നേരിട്ടും കൊടുങ്ങല്ലൂർ വഴി പോകുന്ന ആ വണ്ടിയെ അന്വേഷിക്കുന്നു. സമയം 17:00നോട്‌ അടുക്കുന്നു. ഒരുപാട് വണ്ടികൾ ആ റാമ്പിൽ വന്നുപോയി! 17:00ന് 5 മിനിറ്റ് ബാക്കിയുള്ളപ്പോൾ മേല്പറഞ്ഞ വണ്ടി വന്നപ്പോൾ റാമ്പ് ഒഴിവില്ല. ഹോണടി, കണ്ടക്ടർ വന്ന് മറ്റേ ബസ്സിലെ ഡ്രൈവറെ കുറെ വഴക്ക് ഒക്കെ പറഞ്ഞു ഓടിച്ചുവിട്ടു. നമ്മുടെ വണ്ടി റാമ്പിൽ കയറി. ഞാനും പത്തിൽ താഴെ യാത്രക്കാരും കയറി. കൃത്യം 17:00ന് വണ്ടി എടുത്തു. കണ്ടക്ടർക്ക് എന്തോ ഒരു പന്തികേട് ആദ്യമേ ഫീൽ ചെയ്തിരുന്നു. ഡ്രൈവറോടും എന്തോ തർക്കിക്കുന്നത് കേട്ടു.

224 രൂപ കൊടുങ്ങല്ലൂർ ടിക്കറ്റ് ചില്ലറയായി തന്നെ കൊടുത്തു. ഇതിനിടയിൽ വണ്ടി സിറ്റിയിലെ ഏതൊക്കെയോ സ്റ്റോപ്പുകളിൽ നിർത്തുകയും സ്ത്രീകൾ അടക്കം ഏതാണ്ട് സിറ്റിങ് ഫുൾ ആയി. ഹെഡ്‌സെറ്റിൽ പാട്ടു കേൾക്കുകയും അത്യാവശ്യം ചില വാട്സ്ആപ് മെസേജുകൾ അയക്കുകയും ചെയ്യുന്നത് കാരണം പുറകിൽ നിന്നും ചില്ലറയുടെ പേരിൽ കേട്ട ചില കശപിശ ശ്രദ്ധിച്ചില്ല. കുറച്ചു കഴിഞ്ഞ് ഇയാൾ മുൻപിൽ കയറിയ ഒരു പെൺകുട്ടിയെ കണ്ടക്ടർ സീറ്റിൽ നിന്ന് എഴുനേൽപ്പിക്കുകയും ലേഡീസ് സീറ്റിലേക്ക് മാറ്റിയിരുത്തുകയും ചെയ്തു. ചില്ലറ ആ കുട്ടിയുടെ കൈയ്യിൽ ഉണ്ടായില്ല. ഇനി മേലാൽ ചില്ലറ ഇല്ലാതെ വണ്ടിയിൽ കയറരുത് എന്ന് ആവർത്തിച്ച് പറഞ്ഞുകൊണ്ട് കുറച്ചു കഴിഞ്ഞ് ബാക്കി നൽകി. വണ്ടി അങ്ങിനെ കൊല്ലം സ്റ്റാന്റിൽ എത്താൻ തിരിഞ്ഞെന്നു തോന്നുന്നു, പോലീസ് വണ്ടി സൈഡാക്കിയിട്ട് കൈകാണിക്കുന്നു. എന്തൊക്കെയോ പറഞ്ഞുകൊണ്ട് ഡ്രൈവർ വണ്ടിയൊതുക്കി ഓഫ് ചെയ്തു.

ഒന്നു രണ്ടു സ്ത്രീകൾ ഇറങ്ങി പോലീസിനോട് കണ്ടക്ടറെ ചൂണ്ടി എന്തോ പറയുന്നുണ്ട്. കൂട്ടത്തിലെ SI മുന്നോട്ട് വന്ന് കണ്ടക്ടറെ വിളിച്ച് അയാളുടെ പേരും മറ്റും കുറിച്ചെടുക്കുന്നു, ടാഗ് നോക്കി. പെട്ടെന്ന് കണ്ടക്ടർ ഞാനാരാണ് എന്ന് നിങ്ങൾക്ക് അറിയാമോ എന്നൊക്കെ ചൂടായി പറയുകയും ചോദിക്കുകയും ഒക്കെ ചെയ്യുന്നുണ്ട്. അസാമാന്യ കലിപ്പിൽ മൂന്നു കൂട്ടരും. ഡ്രൈവർ വണ്ടിയിൽ തന്നെ ഇരുന്നു. പിന്നേ ഇറങ്ങി മാറി നിന്ന് രംഗം കാണുന്നു. 15 മിനിറ്റ് കഴിഞ്ഞ് വണ്ടി എടുക്കുന്നു. ഇതിൽ സ്ത്രീകൾ പറയുന്നത് കണ്ടക്ടർ അവരോട് തർക്കത്തിനിടയിൽ അശ്ലീലമായ ഭാഷയിൽ സംസാരിച്ചു, കൂടാതെ കാണിച്ചു തരാം നിനക്കൊക്കെ, മിണ്ടാതെ ഇരുന്നോണം എന്നൊക്ക പറഞ്ഞു എന്നാണ്. അങ്ങനെ കുറച്ചു കഴിഞ്ഞ് വണ്ടി കൊല്ലം സ്റ്റാൻഡിൽ എത്തി. അപ്പോൾ ആ പരാതിക്കാരികൾ ഇതാ അവിടെയും. ഇത്തവണ ഭർത്താക്കന്മാരും പിന്നെ ആരൊക്കെയോ ഉണ്ട്. സംഗതി വീണ്ടും സീൻ!

ഓഫീസിൽ വെളുത്ത ഷർട്ട് ഇട്ട ഒരു സാർ കാര്യങ്ങൾ ചോദിക്കുന്നു, കണ്ടക്ടറും, പരാതിക്കാരുടെ ഭാഗവും തമ്മിൽ ഇപ്പോൾ അടി വീഴും എന്ന നിലയിൽ! വെള്ളഷർട്ട് ഇട്ട സാർ കണ്ടക്ടർ ബാഗും, മെഷീനും ഒക്കെ വാങ്ങിക്കുന്നു, അയാളെ വേറൊരു മുറിയിലേക്ക് കൊണ്ടുപോകുന്നു, പൈസ എണ്ണുന്നു, ഏതാനും രൂപ കുറവ് എന്താണെന്നു ഒക്കെ ചോദിക്കുന്നു. കണ്ടക്ടറും പരാതിക്കാരും വീണ്ടും സംഘർഷം തുടരുന്നു. ഇതിനിടയിൽ അര – മുക്കാൽ മണിക്കൂറിൽ അധികം ആയി. ഞാൻ ആ ഡിപ്പോ സാറിനോട് വണ്ടി പോകുമോന്നു ചോദിച്ചപ്പോൾ 5 മിനിറ്റ് എന്ന് സന്തോഷത്തോടെ മറുപടി. കുറച്ച് ഫോര്മാലിറ്റിസ്‌ ഉണ്ടെന്നു. ഒരുപാട് തവണ ചോദിക്കുന്നവരോടൊക്കെ ഈ 5 മിനിറ്റ് അദ്ദേഹം പറഞ്ഞുകൊണ്ടിരുന്നു! ഇതിനിടയിൽ വീണ്ടും ഓഫീസിലേക്ക്! ഇതിനിടയിൽ എറണാകുളം, ആലപ്പുഴ സ്ഥലങ്ങൾക്ക് ഉള്ളിലുള്ള കുറെ ടിക്കറ്റുകാർ കയറി, പക്ഷെ ബസുമായി ബന്ധപ്പെട്ടുള്ള പ്രശ്നം അറിഞ്ഞു അവരൊക്കെ ഇറങ്ങി നിന്ന് ഏതൊക്കെയോ വണ്ടികളിൽ പോയി!വീണ്ടും പോലീസ് ടീം എത്തി. പിന്നെയും പോർവിളി, സംഘർഷം… ഇതിനിടയിൽ കണ്ടക്ടറെ മാറ്റി പുതിയ ആളെ കിട്ടുമോന്നുള്ള അന്വേഷണം, no രക്ഷ! വെള്ളഷർട്ട് സാർ ഇതിനിടെ ബസ്സിൽ വന്ന് എന്നോടും സംഭവങ്ങൾ ചോദിച്ചു. പേരും ഫോൺ നമ്പറും വാങ്ങി. അറിയാവുന്ന കാര്യങ്ങൾ പറഞ്ഞുകൊടുത്തു. അങ്ങിനെ 21:07 ആയപ്പോൾ വണ്ടി എടുത്തു. ഇതിനിടയിൽ ചില ഫോട്ടോസ് എടുക്കുന്നതിനിടയിൽ എന്റെ ഫോൺ ചാർജ്ജ് തീർന്നു ഓഫായി! പെട്ടു! ഏതാണ്ട് 7 മണിക്ക് കൊല്ലം വന്ന് പോകേണ്ട വണ്ടിയാണ്. അതേ ക്രൂവിനെ വെച്ച് തന്നെ മുന്നോട്ട്.. ഡ്രൈവർ ഇതുവഴി ആദ്യമാണ്, വഴി അറിയില്ല.. അത് വേറൊരു ട്വിസ്റ്റ്‌! ഇതിനിടയിൽ ഒരു വനിതാ കണ്ടക്ടർ ഡ്യൂട്ടി കഴിഞ്ഞ് കൊല്ലത്തിനു ശേഷമുള്ള ഏതോ ഡിപ്പോയിൽ നിന്ന് കയറിയിരുന്നു. മുന്പിലായിരുന്ന കണ്ടക്ടർ അവരോട് പാസ്സ് കാണിക്കാൻ നിങ്ങൾ മുന്നോട്ട് വന്ന് കാണിക്കണമെന്ന് പറഞ്ഞു, അതിന്റെ പേരിൽ യാത്രക്കാർ ഏറ്റുപിടിക്കുന്നു, അവസാനം സോറി പറഞ്ഞു. കരച്ചിലിന്റെ വക്കിലെത്തിയ ആ ചേച്ചിക്ക് ഇറങ്ങുന്ന സ്ഥലം കഴിഞ്ഞ് ഒരു കിലോമീറ്ററോളം കഴിഞ്ഞാണ് കണ്ടക്ടർ നിർത്തി കൊടുത്തത്.ചില പോയിന്റുകളിൽ നിന്നെല്ലാം ആളുകൾ കയറി. സ്ഥിരം യാത്ര ചെയ്യുന്ന ഒരു ചേട്ടൻ കയറേണ്ട സെന്ററുകൾ എത്തുമ്പോൾ വഴി പറഞ്ഞു കയറ്റിച്ചുകൊണ്ടിരുന്നു. ആലപ്പുഴ കഴിഞ്ഞ് ചേർത്തല ഡിപ്പോയിലേക്ക് തിരിയേണ്ട വഴി പിന്നിട്ടപ്പോൾ കണ്ടക്ടർക്ക് ബോധം വന്നു! ഓ നമ്മള് ചേർത്തല കേറുന്ന വഴി കഴിഞ്ഞു! പിന്നെ ഏതോ ഒരു വഴിയിലൂടെ ചേർത്തല സ്റ്റാന്റഡിൽ വീണ്ടും തിരിച്ചിറങ്ങി! അരൂർ എത്തിയപ്പോൾ നേരെ റൈറ്റ് പൊക്കോ.. എന്ന് കണ്ടക്ടർ! യാത്രക്കാർ ഒറ്റ സ്വരത്തിൽ ലെഫ്റ്റ് ലെഫ്റ്റ്… വണ്ടിയുടെ അധിപനായ കണ്ടക്ടറുടെ കല്പന പ്രകാരം ടോൾ പ്ലാസയിൽ എത്തിയപ്പോൾ വീണ്ടും കണ്ടക്ടർക്ക് ബോധവും ബോധ്യവും! U ടേൺ എടുത്ത് തിരികെ തോപ്പുംപടി വഴി എംജി റോഡ്. Ekm സ്റ്റാൻഡിലേക്ക് തിരിയുന്ന പോയിന്റ് ഒരു ചേട്ടൻ ആവർത്തിച്ച് പറഞ്ഞു. പക്ഷേ ബസ്സ്‌ മാധവ ഫാർമസി വഴി, കച്ചേരിപ്പടി നോർത്ത് പാലത്തിനരികെ, ഉടൻ വീണ്ടും കണ്ടക്ടർ നമുക്ക് u turn എടുക്കണം. പകൽ സമയത്ത് എങ്ങാനും ആയിരുന്നുവെങ്കിൽ ബസ്സ്‌ കൊച്ചി സിറ്റി പോലീസ് കസ്റ്റഡിയിൽ കിടന്നേനെ!

വീണ്ടും കച്ചേരിപ്പടി, ചിറ്റൂർ റോഡ് വഴി സ്റ്റാൻഡ്! പാവം ഡ്രൈവർ! അവിടെ കുറെ ആളുകൾ കയറി. ഇതിനിടയിൽ ഒരു റിസർവേഷൻ പാസഞ്ചർ വിളിച്ചു ഇടപ്പിള്ളി ഉണ്ടെന്നു പറഞ്ഞപ്പോൾ “നിങ്ങൾ ഓട്ടോ പിടിച്ച് സ്റ്റാൻഡിൽ വാ, അല്ലെങ്കിൽ കലൂർ വരൂ” എന്നൊക്കെ പറയുന്നത് കേട്ടു. അയാൾ കയറിയോ ആവോ. 10 മിനിട്ടിനു ശേഷം പത്മ വഴി വീണ്ടും കച്ചേരിപ്പടി കലൂർ വഴി മുന്നോട്ട്. ഇടപ്പള്ളിയിൽ നിന്ന് ഏതാനും പേര് കയറി. വരാപ്പുഴ ചിലർ ഇറങ്ങി. “പറവൂർ സ്റ്റാൻഡ് പോകുമോ” എന്ന് ഒരാൾ ചോദിച്ചപ്പോൾ കേട്ട ഭാവം ഇല്ലാതെ കണ്ടക്ടർ. പറവൂർ സ്റ്റാണ്ടിലേക് തിരിയുന്ന സ്ഥലം കഴിഞ്ഞു മുന്നോട്ട് പോകാൻ തുടങ്ങിയപ്പോൾ വീണ്ടും കണ്ടക്ടർക്ക് ബോധം വന്നു. റിവേഴ്‌സ് എടുത്ത് തിരിച്ചു നേരെ സ്റ്റാൻഡിൽ!

പിന്നെ കൊടുങ്ങല്ലൂർ TKSപുരം. ക്ഷമകെട്ട യാത്രക്കാർ ബൈപ്പാസിൽ നിന്ന് നേരെ നേരെ എന്ന് പറയുന്നു. കണ്ടക്ടർക്ക് no ബോധം. വഴി പറഞ്ഞുകൊണ്ട് മുന്പിലിരുന്ന ചേട്ടനും സൈലന്റ് അതോ പുള്ളിയുടെ ബാറ്ററിയും തീർന്നോ ആവോ?! കൊടുങ്ങല്ലൂർ പള്ളി, അമ്പലം ഒക്കെ കൂടി പോകാറാണ് പതിവെന്ന് കണ്ടക്ടർ ഇടക്ക് പറഞ്ഞു, പക്ഷെ ഇത്തവണ ആരും അത് മൈന്റ് ചെയ്തില്ല. ബൈപാസ് സിഗ്നലുകൾ പിന്നിട്ട് ചന്തപ്പുരയിൽ എത്തി. ഞാനും വേറൊരാളും അവിടെയിറങ്ങി. സമയം 02:30. ഓട്ടോ പിടിച്ച് വീട്ടിലെത്തിയപ്പോൾ 02:55!!! സംഭവബഹുലമായ ഒരു ആനവണ്ടി സവാരിക്ക് സമാപ്തി! ആ ബസ്സ്‌ കോഴിക്കോട് എപ്പോൾ എത്തിയോ ആവോ? കണ്ടക്ടർക്ക് എന്തായാലും തിരിച്ചു ചെല്ലുമ്പോൾ ഒരു സ്വീകരണം കൊടുക്കണം. PWD അവാർഡ് മിക്കവാറും റെഡിയായിരിക്കും!

Estadio Santiago Bernabéu കണ്ണീരണിഞ്ഞു ബയേണ്‍, ആശ്വസിച്ച് റയല്‍!

റയല്‍ ആരാധകര്‍ക്ക് വലിയ പ്രതീക്ഷയായിരുന്നു, ഏകപക്ഷീയ വിജയം അവര്‍ സ്വപ്നം കണ്ടിരുന്നു. എന്നാല്‍ ആദ്യ പാദത്തില്‍ നിന്നും വ്യത്യസ്തമായി ബയേണ്‍ കുറച്ചുകൂടി അറ്റാക്കിംഗ് ആയിരുന്നു. കഴിഞ്ഞ മത്സരത്തിന്‍റെ ഏതാണ്ട് റീപ്ലേ ആയിരുന്നു ആദ്യ ഗോള്‍ കിമ്മിച്ച് അടിക്കുന്നത് വരെ, കുറെ നാളായി സിദാന്‍റെ അരുമ എന്ന് പഴി ഏറെ കേള്‍ക്കേണ്ടി വന്ന ഏതാണ്ട് ഫോം ഔട്ട്‌ ആയ ബെന്‍സിമ മഴ്സലോയുടെ അത്യുഗ്രന്‍ ക്രോസില്‍ തലവെച്ചു ഗോള്‍ നേടിയപ്പോള്‍ സ്റ്റെഡിയം അക്ഷരാര്‍ത്ഥത്തില്‍ ത്രസിച്ചു!

പിന്നീടങ്ങോട്ട് ആക്രമണ പ്രത്യാക്രമണങ്ങള്‍. നവാസ് നടത്തിയ ചില അതുഗ്രന്‍ സെവുകള്‍! റയല്‍ പ്രത്യാക്രമണങ്ങള്‍. ആകെ സംഭവ ബഹുലമായിരുന്നു. രണ്ടാം പകുതിയുടെ തുടക്കത്തില്‍ പന്തിന്‍റെ നീക്കം മനസ്സില്‍ കൂട്ടിയ കണക്ക് ഒരു സ്കൂള്‍ കുട്ടിയുടെ പിഴവ് എന്ന് പറയാം. ബയേണ്‍ ഗോളിക്ക് പറ്റിയത് അതായിരുന്നു. ഫലം റയലിനും ബെന്‍സിമക്കും രണ്ടാം ഗോള്‍. കഴിഞ്ഞ മത്സരത്തിലെ തുടര്‍ച്ചയായിരുന്നു ഹമിസ് റോഡ്രിഗസ് ഈ മത്സരത്തിലും തിളങ്ങിയത്. അടിച്ച ഗോളിന് അമിത ആഹ്ലാദ പ്രകടനം നടത്താതെ റൊണാള്‍ഡോ ജുവന്‍റെസ് തട്ടകത്തില്‍ നടത്തിയ പോലെ ഒരു കൂപ്പുകൈ തന്‍റെ പഴയ ഇഷ്ടക്കാര്‍ക്ക് ഉള്ള ഒരു ക്ഷമാപണം ആയിരുന്നോ? ഇത്തവണ കുറച്ചുകൂടി ആക്രമിച്ചു തന്നെ കളിച്ചു. റയല്‍ നിരയില്‍ റൊണാള്‍ഡോ ഒരിക്കല്‍ കൂടി നിറം മങ്ങി. റയലിന്‍റെ പ്രതിരോധം അങ്ങേയറ്റം പരിതാപകരമായ അവസ്ഥയിലാണ് എന്ന് പറയാതെ വയ്യ! കൂടുതല്‍ ഗോള്‍ വീഴാതെ പോയത് ആരുടെയോ ഭാഗ്യം!

അവസാന നിമിഷം വരെ റയല്‍ വിറച്ചുപോയി എന്ന് സംശയം ഏതുമില്ലാതെ പറയാം. പാസ്സുകളിലെ കൃത്യത ബയേണിന്‍റെ ഒരു പ്രത്യേകതയാണ്. റയലിന് ഇനി അടുത്ത ഞായര്‍ രാത്രി ഒരു അഗ്നിപരീക്ഷണമാണ് കാത്തിരിക്കുന്നത്. സീസണിലെ രണ്ടാം എല്‍ ക്ലസ്സിക്കോ! അതും ബാഴ്സ തട്ടകത്തില്‍. ലീഗില്‍ കിരീടം ഉറപ്പിച്ച ബാഴ്സ ഈ കളി ജയിച്ചാല്‍ റയലിന് UCL കിരീട പോരാട്ടത്തിനു മുന്‍പ് കിട്ടുന്ന ഒരു അടിയായിരിക്കും. നേരെ തിരിച്ചാണെങ്കില്‍ UCL ഫൈനലില്‍ അവരുടെ ആത്മവിശ്വാസം അങ്ങേയറ്റം ഉയരുകയും ചെയ്യും.

അലയന്‍സ് അറീനയില്‍ കളി വേറെയാണ്.

ആദ്യ സെമിഫൈനലില്‍ ലിവര്‍പൂള്‍ കോച്ചിന്‍റെ സബ്സ്റ്റിറ്റ്യൂഷന്‍ തീരുമാനങ്ങളാണ് റോമക്ക് തിരിച്ചു വരാന്‍ വീഥിയോരുക്കിയത് എങ്കില്‍ ഇന്നലെ ബയേണ്‍ മ്യൂണിക്കിനെതിരെ റയല്‍ തിരിച്ചു വന്നത് സിദാന്‍ അസെന്‍സിയോയെ ഇറക്കിയതാണ്. മത്സരപരിചയങ്ങളുടെ തഴമ്പിന്‍റെ ധാരാളിത്തം വേണ്ടുവോളം ഉണ്ടെങ്കിലും ഇന്നലെ ബെയിലും, ബെന്‍സിമയും സൈഡ് ബെഞ്ചിലായിരുന്നു കളി തുടങ്ങിയപ്പോള്‍.

ചാമ്പ്യന്‍സ് ലീഗില്‍ എന്നും മികച്ച ഫോമില്‍ കളിച്ചിട്ടുള്ള #CR7 ഇന്നലെ നിഴലില്‍ ഒതുങ്ങിപ്പോയി. ക്രിസ്ത്യനോക്ക് പന്ത് കിട്ടാനുള്ള വഴികള്‍ ഇന്നലെ കുറവായിരുന്നു. നിര്‍ഭാഗ്യം കൊണ്ടാണ് ബയേണ്‍ ഇന്നലെ വിജയിക്കാത്തത് എന്ന് നിസ്സംശയം പറയാം. അവരുടെ നിര്‍ഭാഗ്യം റയലിന്‍റെ ഭാഗ്യവും. അപൂര്‍വ്വം അവസരങ്ങളില്‍ മാത്രമാണ് റൊണാള്‍ഡോക്ക് ബോള്‍ ലഭിച്ചത്. ഷൂട്ട്‌ ചെയ്ത് വലയില്‍ കയറ്റിയ ഒന്ന് ഓഫ് സൈഡിലും പോയി!

നല്ലൊരു പ്രതിരോധ നിര ഇല്ലാത്തത് റയല്‍ മാഡ്രിഡ്‌ ഇനിയെങ്കിലും ചിന്തിച്ചിട്ടുണ്ടോ എന്ന് സംശയമാണ്. പരുക്കന്‍ കളിയുടെ ഉസ്താദ് റാമോസ് മാത്രം വിചാരിച്ചാല്‍ പ്രതിരോധത്തില്‍ കാര്യങ്ങള്‍ സുഗമമാവില്ല. കൂട്ടിനുണ്ടായിരുന്ന മറ്റൊരു ആശാന്‍ പെപ്പെ ടീം വിടുകയും ചെയ്തത് റാമോസും ടീമും നല്ലവണ്ണം മിസ്സ്‌ ചെയ്യുന്നുണ്ടാവണം. പിന്നെയുള്ള മഴ്സേലോക്ക് പിടിപ്പത് പനിയുമുണ്ട്. ആക്രമിക്കുകയും പ്രതിരോധിക്കുകയും ഒരേ സമയത്ത് ചെയ്യേണ്ടി വരുമ്പോള്‍ പാളിച്ചകള്‍ സ്വാഭാവികം. പക്ഷെ മഴ്സേലോക്ക് ഇന്നലെ നല്ല ദിവസമായിരുന്നു. കളിയുടെ അവസാന ഘട്ടത്തില്‍ ഇറങ്ങിയ ബെന്സിമക്ക് ഫിനിഷിങ്ങിലെ പ്രശ്നംകൊണ്ട് സ്കോര്‍ ചെയ്യാന്‍ പറ്റിയതുമില്ല.

ബയേണിനു ആദ്യം തന്നെ റോബന്‍ പരിക്ക് പറ്റി പുറത്ത് പോയത് വലിയ തിരിച്ചടി തന്നെയായിരുന്നു. ഈ പ്രായത്തിലും നല്ല ചില നീക്കങ്ങള്‍ നടത്തിയ റിബറിക്ക് ഭാഗ്യമില്ലാതെപോയപ്പോള്‍ ഉറപ്പായിരുന്നു ഗോളവസരങ്ങള്‍ നഷ്ടമായത് ഒന്നിലേറെ തവണ. ആക്രമണമായിരുന്നു ഇന്നലെ ബയേണിന്‍റെ പ്രധിരോധം. ഗോള്‍മുഖത്തെ കൂട്ടപ്പൊരിച്ചില്‍ പല അവസരങ്ങളും അവര്‍ക്ക് നഷ്ടമായത് ചെറിയ വ്യത്യാസത്തിലാണ്. ബയേണ്‍ നിരയില്‍ ഹമിസ് റോഡ്രിഗസ് ഇന്നലെ നല്ല ഫോമിലായിരുന്നു. ബയേണ്‍ മുന്നേറ്റ നിരക്ക് പന്ത് കിട്ടിയിരുന്നത് ഹാമിസിന്‍റെ കാലുകളില്‍ നിന്നുള്ള അളന്നു മുറിച്ചുള്ള പാസ്സുകളില്‍ ആയിരുന്നു. കളിയുടെ സ്റ്റാറ്റിസ്റ്റിക്സ് എടുത്ത് നോക്കിയാലും ബയേണ്‍ - റയല്‍ വ്യത്യാസം അടുത്തറിയാം.

അടുത്തയാഴ്ച ബെര്‍ണബ്യൂവില്‍ രണ്ടാം പാദ അങ്കം കുറിക്കുമ്പോള്‍ റയലിന് രണ്ട് എവേ ഗോളുകളുടെ മുന്‍തൂക്കം ഉണ്ടെങ്കിലും, ബയേണിനു റയലിനെ മറികടക്കാന്‍ ഗോള്‍ വഴങ്ങതെയുള്ള വലിയ മാര്‍ജിന്‍ വിജയം തന്നെ അത്യാവശ്യമാണ്!